主页 > 时评日报 >产后抑郁点好返 >

产后抑郁点好返

2020-06-16
阅读指数:501

产后抑郁係真係好需要家人嘅支持,但除咗借助外力,最重要係自己要有好返嘅意志!

我能够一个月内好返,其实係因为当时心里OS:「你又话你嗰啲嘢(身心灵)帮到人,咁你又抑郁?.......」。唔得,呢单嘢真係好瘀皮,我一!定!要!好!返!用尽任何我用到嘅方法!我都要快啲好返!

虽然我上面感晒叹号咁好似好劲,但其实当时我个状态係马景涛咁嘅(请重温《点解上天要畀产后抑郁我》配图)。

当时抑郁嘅程度係唔轻嘅,轻生嘅念头係每日都出嚟巡一巡,但论牌面,我衣食无忧,老公又钖我,照顾宝宝又有工人同妈妈双重呵护,个仔重要超级超级超级可爱,理论上係唔「应该」有抑郁,但係抑郁係真係同外在条件无太大关係。

好!我就用尽我所识嘅方去处理我嘅抑郁!

1. 聆听情绪背后讯息
前文讲过,第一样嚟嘅係躁郁,咁开头未知就爆我老公爆到周围都係。咁躁郁嘅时候,再一次提提大家,千祈唔好以为「佢有病」就忍咗佢谂住忍过咗嗰期就算。我的确係有嘢委屈咗自己好耐,以宝宝同大家最大利益的话,我嘅改变,係真係有需要嘅。

2. 让情绪出来
抑郁就係因为压抑太耐,情绪係能量,你越压住能量,佢越会乱咁唧,想喊就喊啦,但想闹人就睇下有冇得唔好闹得咁应,有冇啲易入口嘅方法去解决佢先,如果真係无,我会鼓励你爆。嗱咁你自己就住爆,唔好酿成家暴诸如此类。

3. 负自己嘅责任
好似我嗰啲委屈,其实除咗老公有份食住上之外,我都要攞返自己个责任,我唔够尊重自己嘅感觉同意愿,对自己无信心,怕失去,所以一直死忍去委屈自己。

4. 尝试理解对方
虽然你真係好伟大咁用条命生咗个人出嚟,你身体上嘅痛同创伤係好大,但如果你认真睇下隔离嗰个老公,佢见住你做场咁劲嘅大龙凤出嚟,自己又乜都做唔到,其实都几焦虑嘅。男人嘅嘢,重要通常有脆弱位都唔肯拎出嚟,仲要通常用另一种情绪去遮住,例如用愤怒去遮住内疚,甚至有时佢哋都唔会知自己原来係遮紧一啲自己嘅情绪。但我知,你已经马景涛咁嘅样仲要你去理解对方係唔容易嘅,但都係嗰句,意志!试!

5. 要处理嘅就真係要处理
我当时係hold唔住咁核爆我老公(多谢你咁都无放弃我呜⋯⋯)爆晒啲委屈出嚟之后老公又好好咁作出改变,当时已经由十分躁郁跌到六分抑郁,好咗好多好多,所以需要改变嘅就必须要行动。重有六分我都要搞掂佢!

6. 求助
上面嗰啲自己可处理可尝试嘅都做咗喇, 重会有无端端流眼泪同埋有唔想生存嘅念头出现,我就知道一定重係有啲更深层次嘅嘢,我自己一个解决不了。于是我做咗几次家庭系统排列,搵到我抑郁嘅基调。原来係关于我同我原生家庭嘅一啲未被意识到嘅拉力,甚至係一啲关于我胎儿时期嘅想法,因为有呢啲想法而唔比自己得到幸福(?!)。係呀,其实好多人都唔比自己过得幸福㗎,你无见过人生得靓靓女女但偏偏就係贱人磁石,好多时都係因为一啲原生家庭嘅拉力,而令到佢哋唔畀自己幸福。

当我连结返我嘅母系祖先,我嘅父母,我决定比自己幸福同好好照顾自己之后,我嘅产后抑郁就同我讲byebye,我好似浴火重生咁返番嚟!之前嗰啲无端端流眼泪同轻生嘅念头无咗,重觉得呢个世界係充满爱。我最记得係,当我返到屋企见到我老公,佢送咗份生日礼物比我(如图),我望住份礼物流眼泪。但今次係开心嘅眼泪,我感觉到我老公好爱我!我收到呢份礼物好感动!!!最搞笑嘅係,当时去卫生局检查产后情况,有份产后抑郁问卷比我填,我填完个姑娘为之震惊,话「哗,你个状态好好喎!」我话「係呀~」笑一笑,拨一拨头髮就走出卫生局。

妈!我得咗喇!!!!!!

我重生之后,我觉得自己充满力量。我决定唔再委屈自己,坦诚去同屋企人沟通。我唔要比自己再次跌返入抑郁里面!同埋,我决定要用自己嘅经历去协助需要协助嘅朋友。

蒲咗啲妈妈群咁耐,我係好惊讶于,点解群入面无人提过自己有产后抑郁嘅呢?唔通我真係咁特别?但搵返资料原来病发率係好高㗎喎,十个有六个有,仲要有四个係抑郁半年以上,甚至自此长期食药。

希望我嘅经历可以帮到有需要嘅妈妈或者抑郁嘅朋友。
如果有需要嘅,请联络我哋Cator,睇下有咩可以帮到手,唔好怕羞。

catorcentre@gmail.com

产后抑郁点好返

适逢生日,老公送咗呢条链比我,话係我同仔仔。「咁你呢?」「我係包住你哋嗰个心心。」我即时喊到猪头咁,我终于都再次感受到我老公爱我喇!

相关阅读: